Od 14. marta kada je bio prvi zemljotres na našem području teško da prođu dva – tri dana a da ne osjetimo podrhavanje tla, koje s razlogom dovodi do panike među ionako malobrojnim stanovništvom.
Pričaju ovako uglas mještani Golije, gdje se zemljotresi ponavljaju kao na traci.
Slobodan Kankaraš jedan od dva stanovnika sela Goslić, gdje je sinoć ali i danas bio epicentar zemljotresa naglašava da su oštećeni stari objekti.
„ Sinoć je bio 4,4 stepena po Rihteru, danas 4,7. Ima štete, to su njačešće stare kuće, štale i čatrnje. Popucali su objekti a negdje je pala i cigla. Ovo je velika briga, non – stop trese, od kada je sve ovo počelo ne prekida, od tada se život promijenio. Strah je prisutan, ne možemo sa mirom ni da zaspimo, jer kada krene potres imamo osjećaj da će kompletnu kuću srušiti“, rekao je Kankaraš.
Prema njegovim riječima, iz godine u godinu sve je manje stanovnika na području Golije, a ovakve pojave im ne idu na ruku.
„Radim u Osnovoj školi na Javljenu i svi smo u panici, po nekim procjena ovo će potrajati dva do tri mjeseca. Sanjamo dan kada će mu doći kraj. Veliku nevolju nam zadaju i divlje životinje, sada i zemljotresi. Ipak, najvažnije je da smo svi živi i zdravo“, istakao Kankaraš.
I u ostalim dijelovima pograničnih sela između Gacka i Nikšića osjetio se zemljotres, a još ranije pričinjena je materijalna štete.
„ Zemljotres je trajao dugo i bio je izuzetno jak. Ovo postaje prava noćna mora“, zajednički je zaključak naših sagovornika.